Zwols Emaille Museum

Zwols Veraeltien

 

Zwols Veraeltien over De Manderijne

speciaal voor De Mandarijn geschreven door A. Veld

Ien van de mooiste restauränties wöör ik graag met mien vrouwe naor toe magge gaon, is de Manderien in de Mäntiesstraote. Vrogger ieten dät strötien, Blauwskerenstège.Blauwskeerders verwees naor blauwlakense stof. Der is zels nog een gèvelstien te zien, naost de Manderijne, wöör een skere is of-ebeeld en de letters G en H en ’t jöörtal 1648.

Gastvrouwe en gasteer, Thea en Jan, ebben een eel persoonlijke benaodering. Völle biologische stad- en streekproducten bint terugge te vinnen op de menukaerte. Zwolse mosterd(soep) en boerenkeze en nagelolt, geitenkeze, am- en wörstsoorten uut ’t Vechtdal. Gerechten zonder fratsen, gewoon läkker en puur. En dät wört allemaol ekaokt in een keukentien wöö-j nauwelijks de konte kunt keren.

Ook is ter is genog te zien. ’t Is een klein emaile museumpien. Aoveral angen olde gebruuksveurwärpen van veural uut de keuken van vrogger. Potten, pannen, vergieten, melkkaokers, koffiepotten, stoetetrommels en in verskillende kleuren, gewolkt gries, rood, gruun en wit en blauw. Ook bint ter olde petröliestellegies en kännegies, zand-zepe-soda stellegies. Värder nog een ele verzameling koffiemöllens, and-en wandmalers van Douwe Egberts, Peedee, Kannis & Gunnink en de bi’jpassende veurraodbussen veur koffie, suker, thee en kukies. Pèper- en zoltpötties. Ie kiekt oew ogen uut en allemaole eel erkenbaer.

Ollandse eimwee uut een veurbi’je tied, verbunnen met de lokale (h)eerlijkeid, in ’t ärtien van Zwolle. Een keer binnen lopen, veur een köppien koffie of een pläkkien stoete met boerenkeze of nagelolt met melk of kärnemelk, ’t is de muuite weerd.

Met dank aan Albert Veld (Zwolle) voor dit mooie Zwols verhaal.
(Dit verhaal is rechtenvrij geplaatst met toestemming betrokkenen)